Co zaia i veneti pol continuar a remar e piantar proseco

di ALBERTO VENEZIANO

Vinti region dentro na barca scalcagnada, tre che rema, in qualche modo la barca va. Se le tre le è stufe, le va in “crisi”, le vol el canbio, come se fa “democraticamente” a trovar un rimedio? Se fa. Democraticamente le 20 region le decide. Visto che le le tre region che rema, anca se stufe, le è cusì brave a farlo, visto che l’è alenade, visto tutto ciò, “democraticamente” se delibera che le tre region le continua a remar. Da quanti ani la va avanti cusì? Vinti? Trenta? Sinquanta? A ocio la va cusì da 149 ani visto che nel 1866 l’unico bilancio ativo in italia l’era quel del Veneto.

El “pragmatismo” de Zaia, l’aministrator, le tuto qua: acetar passivamente le decision de chealtri e trovar rimedi co “quel che ghe n’è, anca se ghe n’è sol che fregoe.  Altre possibilità “creative” ma inesplorate? Par esenpio smontar daea barca scasada e farsene una picoeta e agile? Saria na idea ma bisogna smeter par un momento de remar e ai Veneti ghe pias masa remar. Pur de remar i se contentarie de tirar vanti la baraca scasada anca da soi.

Eco la grande idea “pragmatica” de Zaia: el ghe ga promeso ai veneti che i pol continuar a remar. Co la Moretti no se sa ben come che la sarie andata -manco pragmatica, manco amministratrice – ma co Zaia i Veneti pol continuar a remar e piantar proseco da par tuti i cantoni.

La provvisoria stanchesa se pol “pragmaticamente” superarla, ghe vol na qualche droga, ma Draghi el pol fornirghene fin che se vol, na iniesion de “otimismo” Renziano e de “pragmatismo” Zaidista e i remadori riparte. Va ben, go capìo, senpre quea, duri ai banchi e remare par la “patria” italica… go capio ma… speta un momento, scominsia ti, deso rivo… vai vai, rema che ti si bravo rema… varda che bravo che ti si! I to brasi me voria… varda che bravo… ma si! deso rivo, speta un momento… intanto rema ti…

Adeso rivo! Ma iero drio pensar… fa mal pensar intanto che se rema? Apunto! Rema ti che mi penso …